كيف تختارين عطرك المفضل وفق الخطوط العطرية؟

مرحبا مع اول تدوينه لي في هاذي المدونه بالتعاون مع فانيلا :)
العطور بالنسبه لي شي يميز الشخص عن الباقين
غير كذا تعتبر من اجمل الاشياء في الحياه بالنسبه لي>لازم اتفلسف
وفي منها عدة انوع في بعضها تحسون ريحتها تجيب الهدوء والاسترخاء وبعضها حيوي والبعض تحسون بالفخامه من ريحته!
يلا نتكلم عن العطور اكثر :)

تاريخ العطور ومنذ متى بدأت وكيف تم اكتشافها؟
يحدثنا التاريخ أن الإنسان منذ زمن موغل في القدم يستخدم نوعا من العطور، فقد قام بحرق أنواع من النباتات ذات الروائح الفواحة بمثابة بخور يستخدم أثناء القيام بالطقوس الدينية. وقد استخدم الفراعنة العطر منذ خمسة آلاف سنة، إلا أن العرب هم أول من استخدم تاج الزهرة لاستخراج ماء الزهور منذ 1300 عام.ولم يستعمل العرب تاج الأزهار كعطرٍ فقط بل استعملوها كدواء أيضاً. ولعل أقدم أنواع العطور في العالم يدعي "عطر الورد" وقد كان رائجاً جداً لدى القبائل العربية.

وصلت العطور حاليا الى كونها هوس والكل يحاول ينتج عطر مميز بل البعض اصبحوا يعتبرون العطور اعمال فنيه لاتعوض

كيف نختار عطورنا ؟

غالبا نلاقي الاشخاص  يتميزون بريحه خاصه فيهم مهما غيرو عطورهم 

نحس ان عطورهم قريبه من بعض

حتى احنا شخصيا في عطور تجذبنا وفي عطور على طول ننفر منها

هالسبب يرجع ان لكل شخص ميول معين لروائح معينة

اذن هالشي يدل على وجود خطوط عطرية متعدده واللي ممكن عن طريقها ينجذب الشخص للعطر او لأ
وكل خط يحتوي على نوتات  تميزه عن باقي الخطوط!

طيب ماهي النوتات؟!!

النوتات هي التركيبات والمكونات اللي يتكون منها العطر مثلا عندنا عطر مكون من الليمون والتوت اذن الليمون يعتبر نوته والتوت يعتبر نوته

يجي ببالنا سؤال ثاني!

بعض العطور مكونه من نفس النوتات لكن روائحها فيها اختلاف لييه؟؟

السبب يرجع لأن النوتات عندنا لها عدة درجات وهي ثلاثة:

اول درجة:النوتات العاليةtop note

هالدرجه اول شي راح يوصل لحاسه الشم عندنا لما نبخ العطر

والسبب انها تكون مميزه وواضحه حتى تعطينا اول انطباع عن العطر

لكن غالبا ماتستمر لفتره طويلة.

ثاني درجة:النوتات المتوسطة middle note

تبدا تظهر لنا بعد ماتختفي النوتات العالية 

ومكونات هذه الدرجه تكون اثقل من مكونات النوتات العالية

وتكون رائحة العطر الاساسي مع قاعدة النوته.

ثالث درجة:النوتات الاساسيةbase note

هاذي الدرجه هي الاساس بريحة العطر اي المكون الاساسي له

وهي الريحه اللي راح تظل ثابته عندنا لكنها تظهر بعد فتره وتكون ريحتها بحسب تفاعلها مع الجلد

*ملاحظة: احيانا نحط العطر وتكون ريحته بالبدايه غير مستساغه ونقول بننتظر الين تبرد الريحه

بالضبط  هذا يعني ننتظر الين مايتفاعل مع الجلد>هاذي بأسلوب علمي

ثانيا احيانا نلاحظ ان العطر لما احنا نستخدمه يكون في ريحته اختلاف لما احد غيرنا يستخدمه او في ناس مثل مانقول العطور عليهم غير!!

السبب بعد يرجع لتفاعل الجلد مع العطر لان هالتفاعل بيختلف من شخص لشخص وبالتالي راح يعطينا اختلاف بسيط ع الريحه

 غير الخطوط العطريه في ناس يحبون ريحة العطر خفيفه وفي ناس يحبون الريحه قويه وهذا الشي بعد يعتبر ميزة ثانيه للعطور تنحط ضمن شروط اختيار العطر واللي راح اتكلم عنها هي والخطوط العطريه في هاذي التدوينة

آولاً : الخطوط العطرية

تنقسم عندنا الخطوط العطرية لعدة اقسام وهالأقسام تعتمد على نوتات المكونة العطر

غالبا يكون عندنا العطر خليط من عدة نوتات مثلا نوتات من الزهور ومن الاخشاب في هاذي الحاله راح يعتمد خط العطر بحسب النوتات الاساسية .

 نتكلم الحين عن انواع الخطوط العطرية

١-الأزهار floral

من اسم هالخط نعرف ان النوته الاساسيه له هي عباره عن الازهار والورد وتعتبر من اكثر الخطوط رواجا وتتعد فيها الابتكارات العطرية

وتتعدد عندنا الازهار في منها الازهار المائيه والازهار الجبليه وازهار خضراء....الخ

وانا شخصيا من محبين هالخط

ومثل ماقلت ممكن العطر في هذا الخط يحتوي على عدة نوتات لكن تكون النوته الاساسيه والغالبه عليها هي الازهار 

فمثلا ممكن يحتويالعطر على نوتات فاكهية ونوتات الازهار بنفس الوقت لكن نوتات الازهار هي النوتات الاساسية.

وهاذي بعض العطور المشهوره من هذا الخط

٢-الفاكهة الحمضية Citrus
يعتمد هذا الخط العطري على الفاكهة بشكل عام ويعتبر من العطور القديمة والمتوفرة بكثرة ويكون مزيج من الفاكهة مثل الليمون او الجريب فروت او البرتقال وغيرها من الفاكهة الحمضية .....الخ
وغالبا ماتكون الروائح الحاره منها مناسبه للرجال اما الروائح الزهرية منها مناسبه للنساء
ممكن تتسألون كيف الروائح الزهريه منها واحنا عندنا خط زهري خاص!!
عندنا بعض الفاكهة تحتوي على ازهار مثلا:
عندنا ثمار الليمون شجرة الليمون تحتوي على الليمون وزهر الليمون
اذا العطر المركب من نوتة الليمون مناسب للرجال
والزهر المركب من نوتة  زهر الليمون مناسب للنساء

وهاذي بعض العطور المعروفه في الخط الفاكهي

٣-الأروما Aromatic

الأروما او الاعشاب هذا الخط العطري يتكون غالبا من الاعشاب مثل اكليل الجبل والكمون والخزامى وغيرها من النباتات
دائما يتميز هذا الخط العطري ان ريحته قويه وحاره عشان كذا نلاقي اغلب من يميل لهذا الخط هم الرجال
غالبا يتم خلطها مع الروائح الحاره الاخرى مثل الفاكهه 
فتلاقون هالخط غالبا ممزوج مع الخط الفاكهي 
وتلاقونه يستخدم كثير في العطور الرياضية

من امثلة هذا الخط 

٤-العطور المائية Aqua
الخط هذا تكون فيه روائح العطور مائيه يعني تشبه ريحة المياه من مطر او محيطات او هواءالبحر
دائما تكون ريحتها خفيفه ومنعشة وهاديه تجلب الاسترخاء ومناسبه لكلا الجنسين
وغالبا تكون زجاجات هالعطور بدرجات اللون الازرق 
جميله هاذي العطور وقت الدوام تكون شي خفيف وبنفس الوقت شي موثقيل
يمكن وجهة نظري هاذي لأني احب العطور الخفيفه والرايقه والباردة

ومن امثلة هالخط العطري

٥-الفاكهة Fruits
باين من العنوان محتويات هالخط
هالخط يحتوي على العطور اللي نوتاتها الاساسيه  هي الفاكهة
ممكن تتساءلون وش الفرق بينه وبين خط الفاكهه الحمضيه!
بكل بساطه الفاكهه الحمضية من اسمها فيها برتقال وليمون....الخ
لكن هالخط في الفاكهه الاخرى مثل التوت والكرز والعنب
اشهر امثلة هالخط chanel chance
هالعطر اللي الغالبيه هابين فيه  لكن انا مو منهم ماحبيته ابد وحسيته عادي :(
للدقةاكثر الغالبيه يعتبرونه عطر فاكهي والصراحه احترت اصنفه هنا او بالفاكهة الحمضيه لان من نوتاته الليمون والقرع!! لكن كتصنيف ادق هو من الخط الفاكهي الزهري اي يجمع بين خطين

غالبا تصنف الخطوط الفاكهية والفاكهية الحمضيه واروما والمائيه تحت خط عام يسمى خط freshاي العطور المنعشه

٦-خشبي Woody
هذا الخط يعتمد على الاخشاب غالبا تكون روائحه قريبه من الخط الشرقي اللي بتكلم عنه بعد هالنوع
عندنا امثله كثيره لأخشاب ممكن نستفيد منها في العطور 
مثل اخشاب شجر الزيتون وخشب الصندل وخشب اشجار الأرز و نجيل الهند ....الخ
اللي يميز هالخط ان روائحه دافئه وقويه وتناسب الرجال اكثر
لكن هذا مايعني ان في ابتكارات جميله من هالخط تناسب النساء وتعتبر عطور انثويه جدا

٧-جلود Leather
النوته الاساسيه لهذا الخط هو الجلد لكن يتم خلطه مع نوتات من خطوط اخرى
السبب ان ريحة الجلد جدا قويه وكريهه لكن بعد مزجه مع تراكيب مثل الزهور او التراكيب المخملية راح يعطينا تركيب جديد 
ريحته جدا جميله
ومن هالخط كانت بداية صناعة العطور
هاذي بعض الامثلة لهذا الخط

٨-شرقي Oriental
وااه من الشرقي
تعتبر من العطور الفخمة الصراحة ودافئه وحادة بنفس الوقت وطبعا هي من اكثر العطور
اللي تميز العرب وتعتبر من تراثهم
تعرفون عاد اجدادنا واهلينا بالنسبه قمة الفخامه انك تحطين عود وعطور شرقيه
وبعض الدول الخارجيه مثل الهند كانت ومازالت تربط هالعطور بطقوسها الدينية
وعندنا بعد نحب نبخر المساجد بالعود وحتى الرجال بعد قبل مايروحون الصلاة يحبون دهن العود او البخور
جمال هالعطور بالشتاء يعني الجو بارد وتحطين عطر دافي
دايما يجي في بالي عطر ايلي صعب لانه من الخط الشرقي ليييه؟ لانه من اول ماصممه ونزله بالاسواق كل ماشفته بالأعلانات او الصور قلت اذا رحت السوق بشم ريحته ولو اعجبني بشتريه والى هاليوم وانا لما اروح السوق انسى سالفته
لكن مازلت ابي اشم ريحته:(
ايلي يصعب له عدة خطوط في خط زهري بعد اتوقع عارفين اني بتحمس للخط الزهري اكثر لكن لامانع من تجربة الشرقي عندي احساس ان طالما اعشق تصاميم ايلي عصب اكيد عطره جميل>مالهم دخل ادري :)

عادة يكون هالخط ثقيل وزيتي عشان كذا تعتبر العطور الزيتيه من اكثر العطور في الثبات وانتشار الرائحه
تعتمد في روائحها على العنبر والمسك والتوابل والبهارات مثل الكمون والهيل والفلفل

وغالبا يدرج خط الجلود تحت خط العطور الشرقيه
وهاذي بعض العطور من هذا الخط

وبكذا نكون خلصنا من تصنيف العطور بحسب الخطوط العطرية اتمنى اكون افدتكم فيها وحاولت اختصر بقدر المستطاع حتى مايصير الموضوع ممل
ولقيت لكم هذا الموقع من مدونة الجميله Ladymonyana
واللي تختارين منه عطرك المفضل ويطلع لك النوتات الخاصه وبكذا تعرفين ميولك لأي خط وتعرفين لما تطلبين مثلا من الانترنت العطر اللي تحبينه
الموقع (هنا) 

ثانيا:تركيز العطر
في هذا الجانب تكلم عنه موقع leparfum
بالتفصيل وبشكل واضح وقلت احط لكم صورتهم 

واخيرا خلصت تدوينتي 
اتمنى تكون تدوينه ممتعه ومفيدة 
واذا اعجبتكم قولو لي عشان اتحمس اكثر
وزوروني بصفحتي على الانستقرام 
its_sarahgh

استودعتكم الله