اليوم حابه اتكلم عن تجربتي مع هالفيتامينات اللي الكل هاب فيها من اعلنت عنها مودل روز والاقبال عليها شي موطبيعي!
اولا حابه اتكلم عن تجربتي من ناحية السعر!
للأسف ان اول مابدأ الترويج لهالحبوب كان بين التاجرات وللأسف كان النصب بالاسعار كبير ومبالغ فيه وصلت ببعض التاجرات انهم يبيوعونها ب٣٠٠ ريال وهي بالاصل وبالاساس سعرها مايتجاوز ٦٣ريال! حتى لو اضفنا سعر الشحن ماراح توصل للسعر المبالغ اللي هم يلعبون فيه على الناس.
لهذا السبب انا دائما انصح بالبحث عن المنتجات في عدة مواقع قبل الطلب حتى لو كان السعر رخيص لكن ماتسوى السالفه ينضحك علينا فيها.
ثانيا اقرأوا وتثقفوا زين زين زين!
للأسف وانا من الاشخاص اللي اتأسف عليهم في هذا الشأن ! اننا ناخذ بالتجارب الايجابيه وكثرتها وننسى نقرا التجارب السلبيه او مانلقي لها بال عشان الغالبيه كانت تجربته ايجابيه!
انا قريت التجارب الايجابيه وتجارب الاشخاص اللي ماغيرت هالفيتامينات فيهم اي شي وماقريت عن الاشخاص اللي اثرت فيهم بشكل سلبي!
احيانا تغرينا الاعلانات وننسى ان في اشياء عواقبها وخيمة، انا جربت هالحبوب بانتظام لمدة اسبوع مثل ماهو مكتوب على العلبه ٣حبات يوميا وبعدها تركتها رغم اني شفت من ايجابياتها اني لاحظت فرق باظافري لكن انشغلت وانا عندي قاعده يا انتظم واخذ الشي بوقته او اترك الخربطه.
المهم مالكم بالطويله رغم اني اخذتها اسبوع الا انها خربت هرموناتي سنه كامله ومارجع انتظام الهرمونات عندي الا بعد مااخذت حبوب منع حمل لثلاث شهور متواصله! انا طول عمري الدوره الشهريه منتظمه بالتاريخ لكن بعد هالحبوب صارت تنقطع شهرين وثلاث شهور بعد و يدوب كم مره جتني فيه الدوره خلال هذيك السنه واذا جتني تتعبني جدا واحيانا اروح مستشفى بسببها.
وبعد كم شهر من انقاطعها قلت يمكن مشاكل نفسيه رغم اني ماكنت اواجه شي فوق الطبيعي في هذيك السنه لكن بعدها قريت تجارب سلبيه لبنات اخذوها وكانت نفس تجربتي وفي تجارب اسوأ!!!!
ثالثا العضه والعبرة من الموضوع:
تكفون لاتصيرون مستهلكين غير واعيين بخطورة المواد اللي تدخل اجسامكم ومثل هالفيتامينات والمكملات يفترض اخذها بعد اجراء التحاليل اللازمه لان بعض المواد زيادتها خطر "كل شي زاد عن حده انقلب ضده" فمثلا زياده مادة الكالسيوم عن المعدل اللازم تسبب هشاشه في العظام وايضا زياده بعض المواد يسبب نقص في مواد مقابله لها مثل البوتاسيوم والصوديوم فلو زاد الصوديوم انخفض البوتاسيوم وسبب لنا التهابات بالجهاز الهضمي وسوء في عملية الهضم اما لو زاد البوتاسيوم انخفض الصوديوم يسبب الغثيان والشعور بالتعب وآلام في الصدر.
بالتالي لازم يكون عندنا الوعي وعدم التهاون في انفسنا مقابل هالشركات والاعلانات.
"خذ بقدر احتياجك"
رابعا:خذي احتياجك من الاكل :
انا بالنسبه لي صرت ابحث عن المشاكل اللي اواجها بجسمي واشوف وش هي المواد اللي ناقضتني واعوضها بالاكل فقط تووبه من الحبوب فلو تعرضت مثلا لعسر هضم دائما احاول الجأ لأكل الموز او الطماطم او اي غذاء غني بالعنصر اللي احس بالنقص فيه واذا زادت المشكله يسوي الشخص التحاليل المناسبه ومنها بيعرف سبب المشكله.
هالزبده مااطول عليكم بالموضوع وابدا بتجربتي مع معالج inoar
سمعت عن هالمعالج من ملاك الحسيني لما اعلنت عنه اكثر من مره وجازت لي السالفه بما ان سعره فرق كبير بينه وبين المشاغل وغير كذا تجارب الناس معاه ايجابيه وماسبب تساقط او مضار تذكر
نوع شعري
شعري نوعه عادي يميل للناعم بس اتأزم معه لانه مايتجعد وبنفس الوقت مو ناعم تماما يعني فيه تمويجه خفيفه وفيه نفشه وعشان اجعده لازم اظفره واتركه حتى يجف عشان تضبط التجعيده ويطلع مجعد ع الخفيف
لكن الشعرع عندي بطبيعتها سميكه
وشعري طويل الى نهاية ظهري وخفيف فاستخدمت ١٥٠مل من المعالج وكفتني
الأدوات المستخدمه
القفازات+كمامات+سدادة انف+نظارة سباحة+مشط ذو اسنان متقاربه جدا
.............
القفازات: لتوزيع المعالج بسهوله ولايوجد مشاكل في الاستغناء عنه.
الكمامات: انا بصراحه استخدمت ٣كمامات فوق بعضها والسبب ان عندي حساسية في الجيوب الانفيه ورئتي تعبانه
والمعالج مع الحراره يطلع ابخره تكتم.
سدادة الانف: لنفس السبب للكمامات والكمامات لم تكفني شخصيا عن استخدام السدادة.
نظارة السباحة: عند وضع المعالج على الشعر قد يشعر الشخص بحرقة في العينين والابخرة المتصاعده مع الحراره تسبب الدموع والحرقة في العينين.
مشط ذو اسنان متقاربة جدا: لازالة الزائد من المعالج في الشعر.
طريقة الاستخدام:
آولا: نستخدم الشامبو الموجود في الصوره
CHAMPOO
خلال الاستحمام يغسل الشعر مرتين بالشامبو وذلك حتى يزيل جميع الدهون او بقايا المواد سواء كريمات وما الى ذلك من مواد عالقة بالشعر مما يؤدي الى جفاف الشعر تماما حتى يكون له الاستعداد التام لاستقبال المعالج.
ثانيا:تجفيف الشعر
يتم تجفيف الشعر بعد الاستحمام بواسطه مجفف الشعر حتى يجف من الماء تماما
ثالثا: استخدام المعالج الموجود بالصوره
TRATAMIENTO
نقسم الشعر الى اربعة اقسام وكل قسم يقسم الى عدة اقسام صغيره
يتم توزيع المعالج على الشعر ويتم تمشيطه بالمشط الموجود في الصورة الاولى وذلك للتخلص من الزائد من المعالج ولتوزيع المعالج بشكل افضل
ويترك المعالج 20 الى 30 دقيقه حتى ننتقل للخطوة التالية
*ملاحظة* يوضع المعالج على بعد 1سم عن فروة الرأس وذلك حتى لايتسبب بتساقط للشعر
عند استخدامي للمعالج ارتديت النظارات وذلم لتأثر عيناي عند وضعه على الشعر
رابعا:تجفيف الشعر مرة اخرى
يتم في هذه الخطوه تجفيف الشعر من المعالج بواسطة مجفف الشعر بنسبة 90٪
خامسا:استخدام جهاز فرد الشعر
استخدام جهاز فرد الشعر او كما يسميه البعض (سيراميك)او(الايونيك)
الجهاز موجود في هذه الصوره حيث يجب ان تبلغ درجة الحراره 250درجة مئوية الى 270درجة مئويه **انا شخصيا مااستخدمت اللي في الصوره والصوره اخذتها من صفحة بالانستقرام والخاصه بالمعالج لكن انصحكم وبشده تاخذونه من المتجر حق المعالج**
في هذه الخطوه ينصح بالجلوس في مكان ذو تهوئه مناسبه حيث ستتصاعد الابخره من الشعر
ويتم تقسيم الشعر الى اربعة اقسام وكل قسم يقسم الى اجزاء صغيره ويستخدم جهاز الفرد عليها
ويعاد على كل خصله 10 مرات
*في هذه الخطوه انصح باستخدام الكمامات والنظارات و سدادة الانف
الخطوة الاخيرة:
يترك الشعر من ساعتين الى يوم كامل وثم يغسل ولكن يستحسن استخدام شامبو وبلسم مخصص للشعر المفرود حتى يحافظ الشعر على المعالج اطول فترة ممكنة
انا شخصيا استخدم الشامبو والبلسم الموجودين بالصوره
............................................
نسبة فرد المعالج:
تختلف نسبة فرد المعالج من شخص لاخر وتكون من 80٪ الى 100٪
ماهي الفترة الزمنيه التي يبقى فيها المعالج في الشعر؟!
من 4اشهر الى 6اشهر
ويختفي من الشعر جميعه وليس جزء محدد
المعالج والصبغات:
المعالج يقوم بتفتيح الشعر درجة واحدة
وتستطيعين اضافة اي صبغة الى الشعر بعد المعالج ولن يؤثر على مفعول المعالج ولكن يصبغ الشعر بعد المعالج بيومين الى اسبوع اذا كنتِ على عجل
نتائج المعالج على شعري:
نسبه فرده على شعري ٨٥٪ والسبب عدم استخدامي جهاز الفرد المناسب واستخدمت جهاز بقوة ٢٣٠درجة مئويه
ولكن النتيجه بالنسبه لي جميله جدا
قبل المعالج سحبت لون شعري ٣ مرات وصبغته مرتين فكان التلف لاقصى درجاته والجفاف والتقصف
ولكن المعالج ادى مهمته على اتم وجه وذهبت جميع التقصفات والجفاف الشديد بشعري من الصبغات
جديا النتيجه ايجابيه تماما وهذا مو اعلان هههههههههههه
هاذي تجربتي الشخصيه ومتابعيني قليلين جدا عشان تتأكدون انه مو اعلان ههههههههههههههه
وامي واختي جربو معي وبعد النتايج لهم نفس نتيجة شعري وكلنا حبينا النتيجه
الليزر عباره عن تقنية لتخفيف الشعر وليس للإزالة التامه فهي تبطئ من عملية نمو الشعر وتضعف من نموه وتضعف من سمك الشعره ذاتها.
فالليزر يتأثر بأي شي لونه داكن على البشره وبالتالي فالشعر هو اكثر شي داكن على البشره.
لو كان لليزر قوة ازالة الشعر بشكل تام لاصيبت البشره بحروق خاصة تلك الاماكن التي يوجد فيها شامة او آثار جروح او آثارحروق.
لهذا السبب فمفعول الليزر هو تبطيء نمو الشعر والتقليل من سماكته.
يعمل الليزر عن طريق اطلاق اشعة ليزريه بقوة يتم تحديدها من قبل المختص به وتحدد هذه القوه بحسب لون البشره في المنطقه المراد ازالة الشعر منها بالاضافة الى سمك الشعر الموجود في المنطقة فتقوم الاشعة الليزرية بحرق الشعره بالبوصيلة الخاصة بها.
ثانيا: شائعات عن الليزر:
كثيير سمعت سوالف مالها نهايه عن الليزر ومرره كنت خايفه منه الين ماشفت تجارب ناس بعيني !
--قالو انه يسبب السرطان>>لاحظو اي شي جديد في الحياه يقولون عنه مسرطن هاذي شائعه اساسيه في كل شي :/
*اذا ربي كاتب لإنسان انه يصاب بإبتلاء راح يجيه لو قاعد بين اربعه جدران وماسوا شي! قدرة ربي فوق كل شي ومايرد القضاء الا بالدعاء*
--قالو انه يخلي الشعر ينمو تحت الجلد ويصير جسمك كله نقط سودا وماادري وشو>ماانكر ان في كم وحده كذا لكن حلها بسيط روحي سوي تقشير لجسمك واذا وضعه مزري سويي تقشير كيميائي او كربوني ماصار في شي صعب.
--قالو انه يزيد الشعر بالجسم واللي تسويه ماتقدر تتركه مدى الحياه!
قالو وقالو سوالف مالها نهايه هذا جزء صغير من الاشياء اللي قالوها عن الليزر والمشكله اغلب اللي يتكلمون ماجربو ولا شافو شي لمجرد تشويه (*قلت الاغلب مو الكل*)
ثالثا:تجربتي مع الليزر المنزلي "ليزر تريا"
هاذي صورته :
شريته من سنتين تقريبا من موقع سوق دوت كوم ب٢٤٥٠ريال اذا انا مو غلطانه بالسعر :)
هالزبده انا مااشتريته الا بعد بحوث لاني ماقد شفت احد شخصيا مجربه فقلت لازم ابحث وكنت محتاره بين ليزر تريا او فيليبس
قلت لازم اشوف العيوب والمميزات واحكم
دورت في تجارب العرب اغلبهم مستخدم ليزر فيليبس ومالقيت الا وحده تتكلم عن تريا وان تجربتها كانت سلبيه!
بعدها احترت زياده قلت بدور اكثر اكيد فيه فرق ودورت اكثر لان كان الفرق بالسعر كبير بين الليزرين كان تريا ب٢٤٥٠ريال وفيليبس ب٣٦٠٠ريال
المهم مااطول عليكم ولقيت الفرق بعد عناء
١-اكتشفت ان صناعة تريا امريكيه وان صناعة فيليبس تايلنديه
٢-تريا يعمل بتقنية الليزر لكن فيليبس بتقنية الضوء ولإزالة الشعر الليزر اقوى ومفعوله يدوم اكثر والليزر هو المستخدم في العيادات.
٣-الاثنين لهم عدد معين للضربات وبمجرد ماتنتهي ينرمي الجهاز بالزباله :/
٤-رأس الجهاز حق تريا لليزر اصغر بكثير من رأس جهاز فيليبس للضوء.
٥- فيليبس يحتاج ساعه كامله او ٤٥دقيقه عشان ينشحن ومانقدر نستخدمه الا بعد مايكتمل الشحن اما تريا عادي نقدر نستخدمه بدون مايكمل الشحن .
بالنسبه لهالفروق تريا افضل بالنسبه لي :)
بالنسبه للإستخدام يستخدم كل اسبوع مره او كل اسبوعين مره والنتائج كاتبين انها تطلع بعد ٣شهور انا بالنسبه لي شفت من الشهر الاول.
الجهاز فيه ٥مستويات وكل مازدنا مستوى كل ماكان اقوى.
ويوضح لنا مستوى الطاقة في البطارية و عدد الضربات مثل الصوره هاذي
الجهاز مايستخدمه الا اصحاب البشره الفاتحه وفيه جزء يكشف لون البشره واذا كان مناسب راح يشتغل الجهاز اما لو كانت البشره غامقه ماراح يشتغل الجهاز.
يفضل استخدام الجهاز للمناطق اللي الشعر فيها سميك ولونه غامق انا شخصيا لاحظت نتايجه على المناطق الحساسه بس ماشفت شي ع الاماكن الثانيه لان الشعر فيها خفيف ولونه فاتح.
*معلومه اضافية:
شركة تريا قبل فتره انتجت جهاز ليزر مخصص للمناطق الحساسه والوجه
وهذا شكله:
هاذي فديوهات لناس مجربينه:
وهاذي حاطة تجربتها في ٣ اجزاء بالصور للنتائج:
part 1
part 2
part 3
وبالنسبه لتجربتي له اعتبرها ايجابيه بالنسبه لسعره بس تحتاج صبر.
رابعا:تجربتي مع الليزر في العيادات:
انا جربت ليزر العيادات بعد ليزر تريا :)
بتقولون لي لييه جربته وانا مادحه ليزر تريا!
بسبب موضوع الزواج قلت احتاج شي اسرع وكنت على وجه تخرج فماكان عندي وقت لليزر تريا كنت ابي شي سريع
وبالنهايه مافي زواج هههههههههههههههههههه
هالزبده ليزر العيادات من اول مره تشوفين الفرق اصلا تشوفين الشعره وهي تنحرق وتختفي عكس ليزر تريا تخف الشعر مع اكثر من مره
وليزر العيادات سريع مايحتاج تعيدين ع المنطقه اكثر من مره وغير كذا الليزر اللي استخدمته بالعياده ليزر مع تقنية التبريد فكان المه اهون من الم تريا لكن كل ماكان الشعر اسمك والمنطقه اغمق كل ماكان يحرق اكثر
لكن الالم بس وقت الليزر يعني مايطول ويقعد ساعات او ايام
ومقابل هالالم راحه ونظافه طول الوقت
طبعا قبل ماتسوين ليزر راح تكشف عليك الاخصائيه وتحدد لك المناطق اللي محتاجه ليزر
انا شعر جسمي خفيف بس كثير لكن بما ان الشعره اساسا خفيفه قالت لي مايناسبك فسويت المناطق الحساسه والساقين طبعا الساقين بالقوه قعدت ساعه تتمقل في سيقاني هههههههههههه
كنت اتمنى اسوي جسمي كامل لان حتى الفرق بالسعر مو كبير كان الجسم كامل ب١٨٠٠ريال ع الجلسه الوحده وانا ادفع بكل جلسه ١٢٨٠ريال
واحتجت ٧ جلسات وكل جلسه ب١٢٨٠ريال كانت ٦جلسات بفلوس ووحده مجانيه
يعني دفعت بالنهايه ٧٦٨٠ريال
واصير الحين كل سنه اسوي جلستين او ثلاثه
خامسا:الفرق بينهم :)
اكيد عرفتو الفرق من خلال اللي قلته
من ناحية المفعول النهائي نفس بعض مافي فرق بالنسبه لي
من ناحية ظهور النتائج العياده افضل بكثير وتطلع النتائج بسرعه مو مثل تريا يحتاج صبر
من ناحية المبلغ المدفوع تريا ارخص و يوفر كثير
من ناحية الالم اثنينهم فيهم الم واستخدمو بنج احسن لكم بس حسيت تريا يألم اكثر لان اللي استخدمته بالعياده فيه تقنية تبريد.
**بالمختصر اختاري العياده اذا تبين نتايج سريعه واختاري ليزر تريا اذا تبين توفير فلوس وعندك صبر**
والليزر من افضل الاختراعات لازالة الشعر كنت انتف شعر جسمي وبس اقعد اسبوع ويرجع والحين مرتاحه يطلع بالشهر مره واسويه بليزر تريا وما يطلع بكل مكان صارت الشعره خفيفه مره والمنطقه شبه خاليه من الشعر بس اماكن بسيطه يطلع فيها الشعر وبعضه يطلع ويطيح لوحده ثاني شي انا بشرتي جدا حساسه فما ااقدر استخدم شمع او حلاوه بس في مناطق معينه ومااستخدم الا الة ازالة الشعر وهي الصراحه ماتشيل بذمه والالم اقوا من الم الليزر
بس من اهم الحاجات انك ماتستخدمين لازالة الشعر بس شفرة حلاقه"موس" وتراه مايخلي المنطقه خشنه لانك بعده بتستخدمين ليزر
وبس هاذي كانت تجربتي بالتفصيل الممل ؛)
اتمنى تكونون استفدتو منها ولاتنسون تتابعوني ع الانستقرام والسناب شات
حبيت اتكلم عن نظام السوائل هذا النظام طبقته على نفسي و سويت فيه تحدي مع البنات على حسابي بالسناب شات والكل مدح في هذا النظام وشاف نتايج جميله وانا شخصيا منهم :)
انا مو اخصائيه تغذيه ولا هو تخصصي اصلا وكلامي ما جبته من الهوا جبته من دراسات اطباء ومختصين بهالمجال والنظام يعتمد على الماء يعني اذا مانفع ماضر مستحيل مويه تضر انسان الا بإذن الله و انا دمجت نظامين سوا :)
كثير منا يهمل في شرب الماء وانا كنت منهم كنت اشرب بس مع الوجبات واشرب كاسه وحده او كاستين واحيانا يمر يوم كامل مااشرب فيه مويه اصلا!!
لكن لما تعمقت وقريت لقيت كثير مشاكل اعاني منها بسبب نقص الماء مثل الجفاف بالبشره واثار الجروح اللي ماتروح والبشره الغير موحده وتساقط الشعر واشيااء كثير لو اعددها ماانتهيت
ركزو على هالصوره وشوفو كمية الماء في اعضائنا!
وبهاذي الصوره نوضح جزء صغير من فوائد الماء!
ومن اعراض نقص الماء بالجسم:
قلة تناول المياه تسبب أضراراً كثيرة على صحة الإنسان منها الجفاف، وتؤثر على التركيز ووظائف المخ ومن أبرز أعراض نقص المياه في الجسم، نذكر الشعور بالإرهاق والتعب وعدم وجود نضارة فى البشرة وخصوصاً الوجه.
كما يمكن أن يكون الشخص دائم العصبية أو أن يشعر بالصداع وضعف في التركيز، أو حتى أن يشعر بالإمساك.
وتحتوي المياه على العديد من المعادن الثمينة والمواد الغذائية التي يحتاجها الجسم ليعمل بشكل صحيح كما وأن مياه الشرب قبل النوم هي واحدة من أفضل الطرق لمساعدة الجسم في تخزين هذه المواد المغذية والمعادن، إذ يساعد الأمر على تجديد السوائل التي يفقدها الجسم طوال اليوم بسبب النشاط العادي. وتعتبر المياه أيضاً عاملاً طبيعياً لفقد السعرات الحرارية وهي بمثابة مطهر طبيعي لجسمك حيث تجذب العديد من السموم وتخرجها في عملية التبول و خصوصاً أثناء عملية فقدان الوزن.
ماابي اطول عليكم بس حبيت اضيف لكم دراسات وبعض المعلومات اما بالنسبه للأنظمه فمثل ماقلت لكم انا دمجت نظامين وهي كالتالي:
النظام الاول هو نظام الماء الساخن.
والنظام الثاني هو نظام تكثيف السوائل.
فوائدها تساعد في ازاله الدهون المضرة بالجسم وعلاج لأمراض كثيره ونضاره للبشره والشعر بعد :)
نظام الماء الساخن :
هذا النظام واللي اكتشفه م.فارس الحجري والحاصل على براءة اختراع بسببه
هو نظام يعتمد على شرب الماء على الريق ودرجة الحرارة ماتكون مره حاره تكون دافئه تميل للحرارة
ج١
ج٢
ج٣
ج٤
مختصر النظام موجود في هاذي الصورة
بالنسبه لطعم الماء هوو مو مستساغ كثير لكن مو سيء لدرجة ان الشخص مايقدر يتعود عليه انا شخصيا مع ان لي اكثر من سنه على شربه بس ماكنت اتبع النظام بس اشربه ع الريق تقبلت شربه بعد فتره .
اول مره تشربونه ممكن تحصل اعراض جانبيه مثل مغص او اسهال لكن كل هاذي الاعراض عاديه لانها بتكون في اول يوم ولان الجسم ماتعود عليها.
انا شخصيا استفدت كثير من هذا النظام في الدوخه والغثيان والشهيه المسدوده اللي شبه يوميا عندي وللمعلوميه اذا استمرت الدوخه بعد شرب الماء ممكن تكون هبوط في الضغط فلا تخافون انا عني اذا جاتني اقطع لي سلطه واحط عليها ملح عشان يرجع للضغط توازنه.
ثانيا:نظام تكثيف السوائل:
هنا راح نبدا نشرب سوائل كثر مانقدر والسوائل هي:(ماء+عصير+حليب+لبن)
وغير هذا يعتبر مضر مثل:(القهوه+الشاهي+المشروبات الغازية)
قبل كل شي انصحكم بتحميل تطبيق اسمه WaterBalance
قالت لي وحده من البنات عنه والصراحه جدا جميل السوائل اللي تشربينها تدخلين ع البرنامج وتحديد نوعها والكميه اللي شربتيها ويبدا يحسب لك اذا وصل الجسم لكفايته من السوائل ولا لأ :)
اغلب الدراسات حددت ان يجب على الانسان يشرب مالايقل عن ١.٥لتر في اليوم اي مايعادل ٨كاسات في اليوم^ـ^
وكل مازادت الكميه كل ماكان افضل وكل ماكانت من صالح الشخص نفسه!
انا شخصيا احاول اني اشرب باليوم من ٣.٥لتر الى ٤ لتر
اقسمها على ثلاث وجبات واشربها معها
كيفية شرب السوائل مع الوجبات:
ابد لاتفكرين تاكلين وتشربين بنفس الوقت!
لازم نفصلها اما يكون الشرب قبل الوجبه او بعدها وغالبا يفضل يكون قبلها
لكن انا عني اشربها بعد مااخلص اكل:)
وتقدرين تشترين (مطّاره او زمزميه او bottel) سموها بالاسم اللي يعجبكم هههههههههههههههههه
المهم تكون طول الوقت حولك عشان تشربين دايم وتتذكرين *ـ*
وتلاقونها بكل مكان انا شريت من لايف ستايل ومن سيتي ماكس
انا سويت تحدي السوائل مع البنات بالسناب شات لمدة ثلاثين يوم وانا عني بتخذه نمط حياه وهذا سنابي
بس للبنات
وهذا بعد جزء من كلام المشاركات معاي فيه مشكلتي والله انسى احفظ المحادثات ولا هي اكثر من كذا
بالنسبة للنتايج معي فأنا كنت اشتكي من القولون العصبي والهضمي ٩سنين تقريبا
وبعد تحدي السوائل الله يشهد علي نسيت القولون تماما
طبعا كان وضعي مزري مع القولون شبه يوميا منتفخ وآلآم لدرجة اني احيانا مااقدر اتحرك من مكاني من شدة الالم غير كذا الغثيان والدوخه والانيميا هاذي راحت من قبل لاني من زمان مداومه ع المويه الدافيه
بالنسبه لوزني انا نزل خلال هالشهر كيلو واحد لكن انا اساسا ماحتاج لتنزيل وزن اصلا ومثل ماقلت النظام يزيل الدهون الضاره والزائده ولفقدان الوزن لازم الواحد يتبعه لمدة ماتقل عن ٤ شهور:)
انا سويت هالنظام اساسا عشان نظاره البشره لان بشرتي جدا باهته لكن سويته وقت الدوام ومع ضغط الدوام والشغل والتعب بشرتي ماانكر تغيرت شوي لكن التعب والمجهود النفسي له تأثير عليها عشان كذا ماارضتني النتيجه
لكن بإذن الله ارجع للنظام بما اننا الحين في اجازة واعيده من اول وجديد لكن مع تغييرات فيه :)
هالموضوع من زمان ابي اسويه بس كنت بسويه على قناتي في اليوتيوب لكن عندي خلل بالكام
فقلت خلاص طالما بديت بالمدونة راح اكتبه هنا الين الله يفرجها واخذ كام جديده :.)
المهم نيجي لصلب الموضوع وهي التوظيف
تخصصت بالجامعة "علوم حاسب الي" مع اني مااحب هالمجال لكن الكل قال لي ان هالتخصص يفيد في عدة اماكن وعدة مجالات
وحتى في حياتك الشخصة
قلت ي بنت طالما مالقيتي التخصص اللي تتمنينه بجامعتك"تصميم ازياء">>فتحو هالتخصص لما تخرجت:(
وغير كذا حسيت اني ممكن امشي بتخصص الحاسب واني مابفشل فيه ابد
وجا اليوم اللي تخصصت فيه بالحاسب طبعا اكتشفت انه ماراح يفيدني في حياتي الشخصيه لاني مستحيل افصفص جهاز واتكلم عن المعالجات هههههههههههههههه الا لوكنت بشغل
ثانيا التخصص من وجهة نظري ماكان صعب مرره ولاكان سهل
غير كذا لاتحدد صعوبة تخصص من واحد او اثنين شوف الغالبيه وش يقولون
لأن صعوبة التخصص ماتعتمد على المنهج نفسه تعتمد بعد حتى هيئة التدريس لهالتخصص
اتذكر الدفعه اللي اكبر مني كانو يقولون ان السنه الاخيره سهله والكل متساهل معهم لانهم على وجه تخرج
وانا كنت اشوفهم بالاختبارات نحوس احنا بالاختبار وهم بسرعه يطلعون > وتحمست لسنه التخرج
لما جيت لأخر سنه تغيرت هيئة التدريس وانقلبو فوق تحت واخذونا دكاتره ماقد درسوني اصلا وبعضهم جديد
وبالتالي كل التسهيلات اللي للدفعه اللي قبلي طااااااارت علينا :.(
ومن هذا المنوال الواحد مايتخصص تخصص مايقدر عليه
طيب بعد ماتخصصت بدا عندي حلم الماجستير والدكتورا واني اصير معيده وكذا
وكنت مؤمنه تمام الايمان ان ربي بيوفقني ويجي يوم واحقق كل شي اتمناه ومن ضمنها اني اكمل مشواري التعليمي
دايما الله عند حسن ظن عبده به >لكن للأسف صرنا نسمع كلمة انا بومه كثيير او حظي واعرفه خايس دايم
ليييييييه؟! طالما انت شخص بذلت الاسباب وغير كذا تدعي ربك ومحافظ على عباداتك خلاص
لان في ناس لاتصلي ولاتصوم ولاتبذل اسباب الرزق وبعدين يبون كل شي يتنفذ>>لا والله الدنيا لعبه هاااااااه
كيف عرفت بالوظيفه وقدمت عليها؟
كنت اعرف ان جامعتنا يحطون اعلانات عن التقديم للوظايف على موقع الجامعه
ارسلت لي وحده من صديقاتي الاعلان حق الجامعه وانهم يبون استاذات لعلوم الحاسب الالي للمواد العملية
بشرط ان التقدير يكون امتياز او جيد جدا
ولله الحمد تقديري ممتاز ومن الاوائل
قدمت عندهم لكن لما جيت اكتب السيره الذاتيه
تذكرت ان المفروض اكتب فيها كل شي ايجابي واعرفه
المهم تذكرت اني لما كنت ادرس ماكنت ابقي رحله او طلعه للجامعه لازم اروح >عشان اتهرب من المحاضرات وبعذرهههههههه
اكتشفت ان هالمشاوير ماراحت عبث ولله الحمد
لان توني تخرجت ومافي وقت اخذ اي دورات او شي يدعم شهادتي
وانا قد رحت مع الجامعه مؤتمرات ودورات>كنت زائره ماشاركت في شي
لكن كتبت لهم المؤتمرات اللي رحتها ولاني من نفس الجامعه فهم عارفين كل شي
وغير كذا قد حضرت دورة للتعامل بإيجابيه واخذت شهادات عليها
وبالتالي هالحاجات وقفت بصفي :)
اختبار الوظيفه و المقابلة الوظيفية؟
تحدد تاريخ الاختبار ورحت للاختبار كانو المتقدمين كثير وبعد ماتوزعت الاوراق
كان الاختبار في ثلاث مواد من التخصص طلبو منا نسوي شبكات وبرامج انترنت ومخرجات برامج.....الخ
الاسئله كانت سهله وحلوه لكن مستحيل اتذكر كل اللي درسته مع اني قبلها بيوم اخذت جوله على المواد وقريتها بس
والحمدلله اني سويت هالحركه
طبعا حسيت اني حست بالاختبار وطلعت قلت لو فيها خير بيسرها ربي ولو ماانقبلت بروح اقدم دوره انقلش
وقالو لنا ان في طالبتين راح ينقبلون للمقابله الوظيفه :)
كانت شروط المقابلة اني اختار ماده احبها واشرحها لهيئة التدريس كأنهم طلاب عندي
قلت خلاص واخترت مادة الجافا بما اني اعشقها واحبها
وجا يوم المقابله وشرحت لهم وكل شي ولله الحمد انقبلت كنت ببكي من السعاده ومن الصدمه
واكتشفت اني من احسن اللي جاوبو في الاختبار هههههههههههه>الصراحه جاني صدمه على كذا الباقين ماحلو شي
بعد القبول للوظيفة:
اعطوني خمس مواد ادرسها والراتب يعتمد على حسب عدد المحاضرات اللي اعطيها بالشهر
غير كذا متخيلين اني تخرجت وتوظفت على طول ماشاء الله فكانو اغلب الطالبات اللي ادرسهم هم من دفعتي وصديقاتي بس لأن اغلبهم حصل لهم ظروف فاللي اجلت سنه واللي اجلت ترم
وصرت انا اللي ادرسهم
الشي اللي حبيته اني متعوده عليهم وهم بعد فكانت اي وحده يصعب عليها شي تسألني بدون اي تردد
وهالشي ريحني كثيير :)
لكن الشي اللي استفزني لما جيت اختبرهم بأول اختبار كانو متساهلين ويفكرون عشان المعرفه اللي بيننا اني بغششهم واعلمهم
لكن عشم ابليس بالجنه ههههههههههههههههه
بس الصراحه خيبت امالي درجاتهم بالاختبار الاول لكن بعدها عرفو ان الله حق وذاكرو بذمه وضمير ولله الحمد
وبس هاذي كانت تجربتي البسيطه والى الان ماكملت الفصل الدراسي الاول
وبإذن الله اخذ الماجستير والدكتوراه بعد ولو اصير بروفيسوره :)
الله يوفقنا اجمعين وتذكرو مافي شي صعب على الله
توكلو عليه وابذلو الاسباب
واحسنو الظن به
شاركو هاذي التدوينه مع الاشخاص اللي يحتاجونها واي سؤال او استفسار انا مستعده بإذن الله
